Explorar los documents (1 total)

Vòstra question : Desiri obténer d'estatisticas sus la produccion editoriala en lenga occitana.

A la diferéncia d’una produccion nacionala que se pòt evaluar a partir d’estatisticas oficialas qu’espleitan de donadas reglamentàrias (depaus legal, declaracions obligatòrias, ISBN, etc.) amassadas dins de fichièrs oficials e contrarotlats, la produccion d’expression occitana, que se definís pas per un país o una region administrativa unica de produccion mas per la lenga de publicacion, a pas de fichièr d’informacion especific : es comptabilizada al dintre de las produccions nacionalas dels diferents paises, e regionalas dels diferentas regions, ont editors e productors publican de produccions en lenga occitana.

Lo CIRDÒC, dins lo quadre de sas missions de bibliotèca publica de referéncia e pòl associat de la Bibliotèca nacionala de França, aquerís la produccion d’expression occitana tota (libres, CD, DVD, particions, revistas, etc.) que pareis en França mas tanben dins los autres paises. Las basas de donadas d’informacion documentària del CIRDÒC permetan d'aver doncas una evaluacion de la produccion editoriala occitana contemporanèa. Se l'exaustivitat es malaisida d'aténher, de comparasons son estadas fachas amb diferentas basas de donadas documentàrias, e apareis que raras son las produccions d’expression occitana actualas que son pas dins las colleccions del CIRDÒC. Aquestas chifras que seguisson constituïsson pas una estatistica oficiala, donan pasmens un imatge global de l’estat de la produccion occitana actuala.

Las donadas aicí dejós son estadas produsidas sus de mejanas annalas sus un periòde de 15 annadas que va de 2000 cap a 2014 (punt 1.)

Pels títols de jornals, revistas e publicacions periodicas, las donadas concernisson las annadas 2002 e 2015.

(totes supòrts : libres, K7 o CD, VHS o DVD, particions, CD-Rom e docs multimèdias, etc. a l’excepcion dels jornals e revistas)

233 produccions d’expression occitana son referenciadas en mejana cada annada dins las basas del CIRDÒC. Sul periòde de 2000 cap a 2014, se tròba pas d’evolucion màger, las donadas son relativament establas contràriament al nombre de publicacions periodicas (de veire punt 2.)

- Libres : 166 ;

- Supòrts sonòrs : 58 (CD en majoritat) ;

- Supòrts vidèos : 8 (DVD en majoritat).

(Totes supòrts confonduts)

- Òbras de literatura e de ficcion : 51 % ;

- Ensages, òbras scientificas e documentàrias : 30 % ;

- Òbras musicalas : 19 %.

- Romans e novèlas : 35 % ;

- Poesia : 30 % ;

- Contes e faulas : 25 % ;

- Teatre : 6 % ;

- Umor : 3 % ;

- Autres (bendas dessenhadas e filmes de ficcion) : 1 % .

- Lenga e linguistica : 34 % ;

- Estudis e istòria literaris : 32 % ;

- Sciéncias umanas e socialas, istòria, ensages politics, etc. : 18 % ;

- Autres domenis (sciéncias, tecnicas, arts, lésers) : 16 %.

- Musicas actualas : 41 % ;

- Musicas tradicionalas e regionalas : 41 % ;

- Musicas ancianas e sabentas : 11 % ;

Autres genres (tèxtes legits, collectatges e memòria sonòra, etc. : 7 %.

En 2002, lo CIRDÒC aviá identificat 89 títols vius de publicacions periodicas d’expression occitana (revistas, jornals, almanacs, bulletin d’informacion, etc). N’i auriá pas pus que 50 en 2015, çò qu’indica una baissa importanta de las parucions periodicas imprimidas dins lo corrent del decenni, explicabla per una part pel movement general de diminucion dels periodics imprimits al profièch de sites e publicacions numericas.